Atzo goizean aurkeztu zuten, Eibarko Portalea Kultur Etxean, GASTE gazte elkarte berria, Giro Alaia Suspertzeko Talde Eibartarra. Koadrilen arteko mugimendua eta jaietan herritarren partehartzea indartzeko helburuarekin jaio den taldea da eta herriko jaietako giroa suspertzeko hainbat ekintza antolatu dituzte. SanJuanei begira lanean aritu diren arren, GASTE ez da jai hauetara soilik mugatzen eta hemendik aurrera beste jai batzuk hobetzeko asmoarekin lanean jarraituko du.

Estatutuetan zehazten denez, elkartearen helburuak hauek izango dira:

-Gazteen kultur eta aisialdi beharrei erantzutea.

-Partehartzea sustatzea.

-Jaiak bultzatzea.

-Herriko ohitura eta ospakizunak berreskuratzea.

Zehaztu nahi izan dute ez dela koadrila bat, ezta koadrila batzorde bat. "Koadrila mugimendua suspertzen lanean aritutako hainbat gazte gara, koadrila desberdinetakoak" azaldu du Josu Mendicute presidenteak. "Gazte elkarte garen heinean ateak irekita egongo dira, estatutuetan jasotako prozedimendu eta arauekin bat eginez, helburuekin bat datozen guzti horientzat". Prentsaurrekoan azpimarratu nahi izan duten ezaugarria izan da hau: ez dela kuadrila multzoz osatutako taldea, baizik eta pertsonen artean sortutako elkartea. Elkarteko kide edozein kuadrilako partaideak izan daitezke. "Badaude koadrila osoa apuntatu direnak, eta baita bakoitzetik pertsona bat soilik animatu dena" azaldu dute.

Elkartea 70 pertsonaz osatua dago eta estatutu partehartzaileak prestatu dituzte. "Legez Zuzendaritza Batzordeari dagozkion hainbat erabaki, Batzar Orokorrari eman dizkiogu". Zuzendaritza Batzordea honako kideez osatua dago:

Presidentea: Josu Mendicute

Presidente ordea: Andoni Zabala

Idazkaria: Naiara Sarasketa

Diruzaina: Moisés Martín

Hala ere, azaldu dute batzorde honek elkartearen nondik norakoak zuzentzeko lana duen arren, kide guztien inplikazioaz egingo duela aurrera elkarteak. Zentzu horretan, San Juan jaietarako lau lan-talde antolatu dituzte:

-Antolakuntza. Koordinatzaileak: Hasier Iñan eta Aitor Guerrero.

-Errekaudazioa. Koordinatzaileak: Ander Retolaza eta Xabier Markano.

-Materiala.

-Furgoneta.

Koordinatzaileak eta Zuzendaritza Batzordeak osatzen dute talde koordinatzailea, zeinetan lantalde bakoitzak astean egindako lanen errepasoa egiten den, jarraian hurrengo asterako plangintza prestatzeko. Gero, koordinatzaileek talde-bilerak egiten dituzte komisio bakoitzean lana kide guztien artean banatzeko. Modu honetan kide guztiak zuzenean inplikatuta daude jaien antolakuntzan.

Errekaudazioari dagokionez, esan beharra dago 100 dendari eta tabernari baino gehiagok lagundu dutela proiektuaren lehen hastapenetan. Ander Retolaza, dirubilketa lantaldearen koordinatzaileak esker-hitzak izan ditu prentsaurrekoan: "laguntza izugarri ona izaten ari gara, hau gabe ezinezkoa litzaiguke prestatzen dihardugun guztia prestatzea eta indarrak batuz seguru jai hobeak lortuko ditugula. Eskerrak eman beharrean gaude" adierazi du.

Furgoneta bat ere izango dute San Juan jaietan. Dena ondo badoa, Wolkswagen T2 modeloa izango da, hippy eta surflarien furgoneta famatua, hain zuzen. Furgoneta honek teilatua moztuta dauka eta atzeko aldean megafonia sistema darama kalejirak egin ahal izateko. Horrez gain, elkarteko kideentzako edariak eramango dituzte. Opariak ere egongo dira furgonetan, herritarren artean banatzeko: 8000 pegatina, 500 txapa (pin), 500 paypay (abaniko), ehundaka esku-programa, ehundaka karamelo, boligrafoak, kamisetak, konfetiak eta jaietarako hainbat jostailu.

Elkarteko zapia eta edalontzi ekologikoa eramango dute kideek, eta San Juan egunean Fausto tabernak egindako kamiseta bereziak jantziko dituzte Urkizuko parkean pintxoak saltzeko.

Kalejirei dagokienez, ibilaldiak aldatzea erabaki dute. San Juan bezperako koadrilen arteko jolasetarako, adibiez, Juan Gisasola eta Sostoatarren kaleetatik igoko dira kaleotako etxeetako bizilagunei ura botatzeko eskatuz. Horretarako, egun batzuk lehenago bertako etxeetan eskutitzak buzoiratuko dituzte. Berdin egingo dute Isasi kalean, Zezen Plazatik Untzagara itzultzeko. Gainera, Auzitegi ondoan H2O enpresak zizterna-kamio bat jarriko du 1500 litro ur botatzeko.

San Juan egunari dagokionez, ekitaldi nagusia, Urkizuko parkean txahal bat erre eta pintxoak eskainiko dituztela izango da. Ingurua girotzeko eta herritarrak bertaratzeko, Untzaga plazatik bertaraino trikitilariek kalejira egingo dute. Txahala erretzea Eusko Label Fundazioa eta Oberena Harategiaren laguntzaz egingo da, eta antolakuntzan Agiñaspi tabernak ere hartu du parte. Horrez gain, auzoko tabernari eta dendari askoren laguntza ere jaso dute.

San Juan txiki egunean, koadrilek Makailauaren Kofradixiak antolatutako Marmittako Lehiaketan parte hartuko dute jarraian Bazkari Herrikoia eginteko, azken bi urteotan bezala. Bazkariaren ondoren ekitaldi berriak egingo dituzte estreinakoz. Karaokea, txiste lehiaketa eta I. Irrintzi Lehiaketa egingo dira.

Ekitaldien gastuei aurre egiteko ekimenen artean rifa bat atera dute, zeinetan euro baten truke opari politak lortu daitezkeen. Lehen saria, Alfa produktu sorta (aspiragailua, josteko makina eta batidora), eta bigarren saria afaria bi pertsonarentzat Kantabria Jatetxean.

Hona hemen programa:

Ekainak 23
12.00 Koadrilen aurkezpena eta kalejira Urkizura.
12.30 Txorizoa eta salda Urkizun.
13.00 Ongietorria dultzaineroei. Txupinazoa. Bazkari herrikoia.
17.30 Koadrilen bilkura Untzagan eta kalejira Zezen-Plazara, Juan Gisasola eta Sostoatarren kaleetatik (etxeetatik ura bota dezaten eskatuko dugu: astebete lehenago, kartaz, eta egunean bertan oihuka). Zisterna kamioi batek ere ura botako du.
18.00 Zezen Plazan, koadrilen arteko jokoak eta enbolauak. Jolasetan parte hartzeko adina: 16 urtetik gora.
21.00 Kalejira Isasitik behera.
05.00 Txokolate jana Untzagan, kalejira eta Konga-Dantza Tas-Tas pubean.

Ekainak 24
11.00 Gauean zehar erretako txahala salduko dugu Urkizuko parkean. 1.300 pintxo. Eusko Label eta Oberena Harategiarekin elkarlanean eta auzoko tabernari eta dendarien laguntzaz. Untzagatik Urkizura trikitilariak. Umeentzako tailerrak eta Naturgloboa (Naturgasekin elkarlanean, globo aerostatikoa).

Ekainak 25
Marmitako lehiaketa eta bazkari herrikoia. Jarraian, txiste eta irrintzi lehiaketak eta karaokea.

Hala ere, "B plana" ere prestatzen ari dira, eta Eibar K.E.ak play-off partidua baldin badu, aldaketak egitea aurreikusten dute, eta zentzu horretan EibarPrimeran plataformarekin elkarlanean dihardute. "Datorren astean programa berria ezagutzera ematea espero dugu, Eibarrek irabazi duen seinale izango zen eta. Hala gertatzen bada, eta espero dugu baietz, ekitaldiak Eibar Primeran plataformarekin batera egingo ditugu taldea animatzeko eta jaiak gorri-urdinak izan daitezen" aurreratu dute.

"GASTE gara gazte, ta ez gaude konforme" dio kantuak, eta elkarte honetatik ere dagoeneko hainbat eskari egin dizkiote Udalari: txaranga gehiagoren kontratazioa, Marmittako Lehiaketan Gazte Saria ematea eta fogoi gehiago erostea, besteak beste. Horrez gain, gaztetxoentzat jolasak egitea ere eskatu diote, Zezen Plazako jokoak 16 urtetik gorakoentzat izan daitezen. "Monitoreak kontratatu dituztela esan digute gazteenek ere aukerak izan ditzaten koadrila-jolasak egiteko". GASTEko kideek eibartar guztiak animatzen ditu aurtengo jaietan egingo diren ekitaldietan parte hartzera, denonak diren jaiak, denon artean eta denontzako eginez.